Daar is ‘n baie bekende stelling deur die Griekse filosoof Plato, 428-348 vC, wat lui: “Wees sag en goedhartig, want elke mens wat jy ontmoet is besig met ‘n worstelstryd van een of ander aard.”
Natuurlik het Plato nie vir Christus geken nie (hy is immers 341 jaar voor Christus se aardse geboorte oorlede). Christus se opdrag oor deernis is egter selfs nog ruimer as Plato se verstaan daarvan. Die vier evangelies is vol van voorbeelde van die Here Jesus se omvattende (en aktiewe) deernis met mense wat sy pad gekruis het. En die Nuwe Testament getuig van gelowiges wat aan daardie deernis van Christus in hul lewens gestalte gegee het … in navolging van sy voorbeeld en gehoorsaam aan die opdrag van sy Woord.
Kolossense 3:12 herinner ons met die oog op die week waarmee ons besig is: “Julle is die uitverkore volk van God wat Hy baie liefhet. Daarom moet julle meelewend, goedgesind, nederig, sagmoedig en verdraagsaam wees.” Lees weer hierdie hoofletterwoorde in ons reis saam met Jesus Christus: meelewend | goedgesind | nederig | sagmoedig | verdraagsaam. Leef dan gehoorsaam hierdie vyf woorde in jou kontak met mense uit.